Sclerosi laterale amiotrofica: su scioperu de sa famini de Usala intrat in Parlamentu. 150 personas ant addiriu in totu s'Italia

(IlMinuto) - Casteddu, 9 de su mes''e totussantus - "De su mesunoti de oi (7 de su mes''e totussantus n.d.r.) m'apa a uniri a s'iniziativa paxiosa e de dialogu intraprendia de Salvatore Usala, Giorgio Pinna e Mauro Serra". Dd'at declarau sa deputada de su Partito Radicale, Maria Antonietta Coscioni, candu at addiriu a s'iscioperu de su famini fattu de Usala po rivindicai un'assistenzia mellus po totus is malàdius de Sla. Ariseru sa parlamentari, e presidenti de s'associazioni Luca Coscioni, at fattu bisita a su promotori de s'iniziativa in sa domu de Paùli e at esortau a sa mobilitazioni in totu s'Italia aregollendi 150 consensus in pagus oras. "Appu giai presentau diversas interrogazionis in su 'Ministero della Salute' - at declarau sa deputada - aundi dinunziu sa situazioni de Usala, Serra, Pinna e medas malàdius de Sla". Est drammaticu - sighit s'esponenti de is radicalis - ca in Sardigna, comenti in is ateras regionis italianas, no ddoi siat una mappadura geogràfica de sa distribuzioni de custa maladia, cosa chi iat giai nau duus annus fait. Est drammaticu cussu chi Usala scririt a su sottosegretariu Fazio: "Ocannu funt mortus po abbandonu medas maladius, màssimu poita non tenendi curas, no ant fattu sa 'tracheotomia'". Sa lota de Usala e de is maladius de Sclerosi laterale amiotrofica at arregortu puru sa solidariedadi de Rifondazione comunista Sardegna: "Su Prc - si podit liggiri in d'una nota - sustenit sa lota drammatica de Salvatore (iscrittu a su Partidu de candu est nasciu) e de is maladius de Sla, una lota chi fait parti de una battalla po unu sistema sanitariu chi siat accanta a is bisòngius de is zitadinus e dùncas fondau asuba de finanziamentus giustus e agiudau de ispecificas politicas de organizzazioni".

Po aderiri a s'iniziativa: www.lucacoscioni.it