Portovesme srl: is traballantis sighint su presidiu in viale Trento abetendi s'atóbiu de su 15 de su mes''e ledaminis tra sa Giunta e su Governu

(IlMinuto) – Casteddu, 7 de su mes''e ledaminis - At a sighiri finzas a su 15 de su mes''e ledaminis - diri fissada po s'atóbiu tra sa Giunta regionali e su ministru de su "Sviluppo economico" Antonio Scajola - su presidiu esternu in viale Trento, in Casteddu, de is traballantis de sa Portovesme srl, chi ariseru iant ocupau calincunu ufíciu de su Palazzu de sa Regioni. "Sa Giunta - precisat su consilleri regionali de su Pd Giampaolo Diana - podit e depit spingi su Guvernu 'amigu' a currígiri sa diretiva de su Ministru Scajola, chi at in is fattus aggravau sa cosa po is impresas sadras chi bivint de energia ponendi parametrus chi creant damnu a su pianu energeticu nazionali. Unu pastìcciu chi is traballantis Portovesme srl e cussus de totu su Surcis funt paghendi caru". De is 700 traballantis de s'azienda in su polu industriali surcitanu - spiegat una nota de sa Cgil - 450 funt in cassa integrazioni, su blocu de is produzionis si bidi puru po aterus 600 traballantis de s'indottu. "Su nuu de sa chistioni est su costu de s'energia - ispiegat su segretariu de sa "Camera del Lavoro" de su Surcis Mario Grecu - su 31 de su mes''e paschixèdda scadint is acórdius cun is aziendas chi iant permitiu s'abbasciamentu de is tarifas, ma Regioni e Guvernu no ant donau respostas in meritu a cussu chi iat a depi sussediri in cussa data".