Carrefour Italia ndi liat dinai a "stipendius, bonus e dirittus", isciòpiru e volantinaggiu cras in Cuartu Sant'Alèni

(IlMinuto) – Casteddu, 2 de su mes''e ledaminis - "Scéti po oi, chi no comporas, as a tenni in omaggiu un'abbràzzidu de ritirai candu bollis". Est custu su cumbidu ironicu scrittu in su volantinu chi cras a mangianu is traballantis de Carrefour ant a donai a is clientis: in totu Italia is traballantis de sa multinazionali francesa ant a ingruxai is brazzus po protestai contra a sa dezzisioni aziendali de sminciri su cuntrattu integrativu e ant a pediri a is familias su pràxeri de fai sa spesa de sa cida nd'un'ateru logu. Sa manifestazioni, boffia de Cgil, Cisl e Uil, at a biri comenti protagonista puru s'ipemercau de Cuartu Sant'Alèni. "Carrefour - si podit liggiri in su volantinu chi at essi donau cras - oferit  a is clientis e a is consumadoris prodotus e a nosu ndi tirat su stipendiu, is bonus e is dirittus". A su postu de su cuntrattu integrativu Carrefour Italia at donau a is própius traballantis una brochure informativa chi chistionat de is regulas noas attivas de su mes''e ledaminis. "Tra is dirittus tiraus senz''e nesciunu confrontu cun is sindacaus - si podit liggiri in d'una nota - ddoi funt sa paga po maladia (chi benit liada), is pausas de traballu retribuias e is prémius aziendalis".