Ancora pagus diris a sa V Olimpiadi de su giogu tradizionali sadru

(IlMinuto) – Casteddu, 15 de su mes''e ledaminis - 350 partecipantis d'edadi comprèndia tra is 6 e is 18 annus, 4 nazionis rappresentadas, 29 comunus sadrus coinvoltus: funt custus is nùmerus de sa V edizioni de s'Olimpiadi de su giogu tradizionali, una manifestazioni unica in Sardigna. Giogus e divertimentu aspettant piticus e mannus chi ant a partecipai a sa manifestazioni agonistica, chi s'at a tenni tra su 24 e su 25 de su mes''e ledaminis in Luamadrò e in Baradìle. Is attividadis selezionadas in su repertoriu meda mannu de is giogus tradizionalis funt: su giogu 'e su fusti, s'arcu, is cuaddeddus de canna, sa cadiredda santa, su cuaddu proceddu, su xricu, su dinai (a pistincai), su pencaneddu, sa badruffa, is biccus, is brillias, sa luna monta, is carruccius, su sattiu cun sa funi e su pimpirimponi. Comenti dogn'annu, s'Olimpiadi at essi precedia de unu convegnu internazionali chi s'at a tenni su 23 de su mes''e ledaminis in Collinas, in su cursu de su cali s'at a fueddai de sa circa intraprendia de meda tempus in meda logus de su Mediterraneu e de su Mediu Orienti, circa chi istudiat is giogus tradizionalis; s'at a chistionai puru de s'isviluppu possibili de una rezza de coperazioni tra is stadus e is regionis.