No scéti maistus: Sa protesta "anti-Gelmini" de is precarius de s'iscola bloccat po medas oras via Roma. 270 traballus de mancu po is traballantis Ata

(IlMinuto) - Casteddu, 9 de su mes''e cabudanni - Ariseru a merì su tràficu in via Roma, in Casteddu, esti stetiu bloccau po medas oras, e in tot''e duus is percursus de marcia. A ostruiri su flussu de is màcchinas funti stetius circa milla precarius de s'iscola, chi ant portau sa própriu protesta contra a is taglius fattus de sa Gelmini a facc'e de su Consillu regionali. Ant manifestau no scéti is maistus senz''e traballu, ma puru medissimus ausiliarius, ténnicus e amministrativus. "Po is traballantis Ata - si podit liggiri in d'unu documentu diffùndiu de is precarius de s'iscola de Casteddu - ddoi esti stetiu unu tagliu de 270 postus: is 3626 traballus in s'organicu provinziali funt calaus a 3348, in su giru de duus annus si previdit unu tagliu de 850 postus". In sa diri de ariseru una delegazioni de is manifestantis at atobiau sa "Commissione cultura" in su Consillu regionali. Sa mobilitazioni at a sighiri finzas a ottèniri garanzias seguras po is traballus: ddu narat Efisia Fronteddu de sa Flc Cgil. "Un'atera mobilitazioni est previdia po su 17 de su mes''e cabudanni - spiegat - e s'ocupazioni de s'Ufíciu "provinciale della scuola" at a sighiri finzas a candu no eus a tenni garanzias seguras po is organicus". "Pedeus chi su Consillu regionali pighit attu de sa situazioni de is precarius - at nau Oriana Putzolu de sa Cisl - e intraprendat una vertenza importanti cun su Guvernu po s'iscola". "Cun custus taglius - si podit liggiri in d'una nota de is Cobas - su Guvernu aumentat scéti s'esercitu de is disoccupaus: genti meda chi finzas a ocannu teniat unu traballu oi s'agatat in s'istrada. Chi at a obèrriri is iscolas? Chi at allichidiri is edificius?  Chi at amministrai is segreterias?".