Is massajus e is pastoris sadrus presentant su contu a sa commissaria Ue: "1800 impresas serradas in d'un'annu"

(IlMinuto) – Casteddu, 25 de su mes''e cabudanni -  "S'annu passau in Sardigna ant serrau 1800 aziendas de massajus: cant'ant essi s'annu chi benit?" Custus is fueddus scrittus in su striscioni portau de 100 pastori e massajus po aghilliri sa commissaria europea Mariann Fischer Boel in ocasioni de s'arribbu in Consillu regionali, in Casteddu. S'intentu de is manifestantis de dinunziai "is effettus de sa politica europea po sa massaria de sa Sardigna" esti stetiu otentu. Su Comitau de is pastoris e de is massajus - chi, tra brebeis e crabas, presidiàt is intradas de su Palazzu - est arrenèsciu a strappai un'atóbiu a sa rappresentanti de s'Unioni europea. Su coordinadori regionali de Altragricoltura, Mario Mereu, massaju de Deximu Putzu, e su pastori Maddalena Cualbu, de su comitau de Santu Bainju, ant presentau a sa Commissaria Fischer Boel su documentu fattu in is diris passadas de occupazioni, documentu creau in basi a sa Dichiarazioni de Via Campesina: un'ispézia de carta de is diritus de is massajus de totu su mundu. "Seus arrenèscius a presentai una figura realistica de sa massaria sadra - at ispiegau a IlMinuto Gianni Fabbris de Altragricoltura - completamenti diversa de cussa fatta conòsciri de sa Regioni".