Iscola: Fassino e Barracciu in s'Usp ocupau de Su Masu. Precariu: "Basta dinai pubblicu a is iscolas privadas"

(IlMinuto) – Casteddu, 28 de su mes''e cabudanni - Mantèniri sa mobilitazioni: esti stetia custu s'indicu donau de su deputau de su Pd Piero Fassino a is precarius de s'iscola de Casteddu. Sàbudu a mangianu su parlamentaris e sa consillera regionali Francesca Barracciu ant portau sa própriu solidariedadi a is traballantis de s'instruzioni chi de su 2 de su mes''e cabudanni ocupant s'"Ufficio scolastico provinciale" in Su Masu. "Is precarius - si podit liggiri in d'una nota stampa - ant precisau in medas interventus su bisóngiu de pòniri prus forza in is lotas de s'oposizioni po sa chistioni de s'iscola". "Esti stetia precisada a su màssimu - sighit su testu - sa totali contrariedadi de su finanziamentu pubblicu a is iscolas privadas, sempri prus manna in is ùltimus annus".