Iscola: crescit s'unda de sa protesta. Cras sit in in Casteddu. Sighit s'ocupazioni de s'Usp

(IlMinuto) – Casteddu, 4 de su mes''e cabudanni - Sa protesta nazionali contra a is taglius a s'iscola interessat in manera sempri prus intensa puru sa Sardigna. Mentris sighit s'ocupazioni de s'ex "Provveditorato degli Studi" in Su Masu, cras a is 10 est su mundu de s'iscola chi at a manifestai in prazza Palazzo, po su "No Gelmini Day". A custa dimostrazioni at a sighiri, po martis 8 de su mes''e cabudanni, a is 15.30, unu sit in organizzau de sa Flc Cgil. Segundu cantu narant is Cobas, s'atóbiu de ariseru in sa sedi de s'Usp, cun su Direttori Generali Armando Pietrella no at portau nesciunu risurtau positivu. "Pietrella - si podit liggiri in d'una nota Cobas - no at fattu unu passu agoa po cantu riguardat is provvedimentus de s'Usp, chi toccant s'iscola sadra in modu meda prus pesanti de cantu no faint is giai grais provvedimentus de su Guvernu". S'ocupazioni at arregortu puru su sustegnu de is diversas forzas politicas, totus crìticas riguardu a su cuncordu tra Stadu e Regioni po s'instruzioni, chi istabilit de usai po su sustegniu de is maistus precarius su dinai - si fueddat de 20millionis - giai donau po cuntrastai s'ispargimentu de s'iscola. A s'atóbiu de ariseru ant partecipau, tra is aterus, su parlamentari Federico Palomba (Idv), su consilleri regionali Silvio Lai (Pd) e su segretariu regionali de su Prc Gianni Fresu.