Domu: su Consillu regionali aprovat s'odg "antisfratti". Zuncheddu: "Immoi sa Giunta depit inzuzulai su Prefetu"

(IlMinuto) - Casteddu, 11 de su mes''e austu - In is istituzionis sa mobilitazioni contra a is isfratus annunziaus de s'Area andat innantis. In is diris passadas esti stetiu aprovau de su Consillu regionali (36 votus favorabilis e 18 contra) un'odg - chi tenit comenti primu firmataria Claudia Zuncheddu de is Rossomori - chi impignat sa Giunta regionali a intervenniri po otèniri "una suspensioni lestra" de is isfratus. "Su Consillu - si podit ligiri in su testu aprovau de su Consillu - impignat sa Giunta regionali e in s'ispecificu is assessoris cumpetentis in matéria de "Lavori pubblici", "Enti locali", "Sanità" e "Servizi sociali" a intervenniri cun is amministrazionis (n.d.r. Area) e cun is autoridadis, puru statalis, chi si ocupant de s'órdini pubblicu, po otèniri una suspensioni lestra de is atus esecutivus". "Eus otenniu una vitória politica - ispiegat Zuncheddu - chi est po prima cosa un'ispériu po sa genti nostra. Immoi abetaus ca sa Giunta inzuzulit su prefetu po pònniri in atu totu custu".