Poesia e fotografia, in Otieri sa mustra “Sogni meridiani” de Salvatore Ligios
«Su poeta non bidet a fundu ma a largu», naraiat Matthew Arnold, poeta fintzas isse, nàschidu duos sèculos a como in Inghilterra. Ma su fotògrafu comente bidet? E, pro su chi nos pertocat, comente las bidet sas caras e sas carenas de sos poetas? A fundu o a largu? Sa fotografia nos torrat ebbia unu ritratu o puru cussa immàgine b’annanghet potèntzia a sos versos suos?
Una risposta a custas dimandas bi la diamus pòdere àere dae chenàbura su 25 de santugaine, die de abertura pùblica de sa mustra de Salvatore Ligios “Sogni meridiani – Viaggio nella poesia contemporanea della Sardegna”. S’apuntamentu inaugurale est a sas ses de merie cun s’espositzione in intro de su Museu tzìvicu archeològicu “Alle Clarisse” in pratza de Baden Powell.
Sa mustra, organizada dae s’assòtziu Premio Ozieri Aps cun patrotzìniu comunale e cun sa collaboratzione de s’Istituzione San Michele, est aberta finas a su primu de nadale e rapresentat un’apuntamentu nou a costàgiu de sa de sessantaghimbe editziones de su prèmiu nòdidu de literadura sarda (cun sa tzerimònia finale de premiatzione in programma in sa tzitade de Antoni Cubeddu e de Tonino Ledda, su 23 de santandria).
In intro de s’inauguratzione su diretore artìsticu de su Prèmiu Otieri e segretàriu de s’Aps, Marco Fenudi, at a chistionare cun su protagonista de sa mustra Salvatore Ligios. In programma fintzas carchi letura de sos poetas ritratos e sos interventos de su sìndigu de Otieri Marco Peralta e de su presidente de s’Aps Premio Ozieri Vittorio Ledda.
«Su fotògrafu Salvatore Ligios – comente leghimus in s’assuntu de su volume “Sogni meridiani” publicadu dae Soter – at miradu a su mundu de sa poesia isulana, in totu sas variantes suas: limba sarda, limba italiana, iscrita, orale, improvisada, resada o cantada, versiones locales e comunales, barighende·nche impèigos e difidèntzias. Unu caminu longu e intrigadore dae su càntaru de su mistèriu chi alimentat una pràtica prus chi no antiga e chi galu oe nùdrigat sa fantasia e s’immaginatzione de s’òmine cuntemporàneu».
In sa mustra de Otieri b’at 60 ritratos de grandu mannària. S’autore at impreadu sa pellìcula in biancu e nieddu chi isvilupat pro contu suo in sa càmera oscura. Sas imprentas mannas pro s’espositzione las ant fatas in su laboratòriu GreatPrint de Giorgio Pisu. Custos sos oràrios pro las pòdere ammirare: dae su martis a sa domìniga dae sas 9 a sa una e dae sa tres a sas sete de merie.
Salvatore Ligios est nàschidu in Biddanoa Monteleone, in ue istat, su 1949. Dae su 2000 a su 2008 at dirìgidu su museu Su Palatu, tzentru espositivu ispetzializadu in fotografia e, in sos annos, at espostu sos traballos suos in Sardigna, Itàlia e Europa. Dotzente de fotografia dae su 2008 a su 2015 in s'Acadèmia de Tàtari, at publicadu unos cantos libros; s’ùrtimu su 2024, “Conversazioni II. Incisioni e fotografie”, chistionende cun s’artista Gabriella Locci.