Sa Lega contra a unu cursu de "Teorias Gender e Queer" in s'Universidade tataresa. Ghirra: «Leghide·bos a Brecht»

Sa nova chi in s’Universidade de Tàtari bi devet àere unu cursu de “Teorias Gender e Queer” nch’est lòmpida a su parlamentu. Su deputadu leghista Rossano Sasso, sas dies coladas, aiat pedidu un’interventu de sa ministra de s’Universidade Anna Maria Bernini. Oe est intervènnida sa parlamentare sarda de Avs Francesca Ghirra ammentende a su collega chi sos ateneos tenent s’autonomia issoro e chi in s’Universidade b’est sa «libertade de sa connoschèntzia iscientìfica». «Li cussìgio sa letura de s’òpera de Brecht “Vita di Galileo” a tales chi cumprendat ite cajonat sa pretesa de un’autoridade polìtica controllende s’operadu de istudiosos e istudiosas». Su dotzente de su cursu est su Professore Federico Zappino.