In Milis sa prima festa natzionale de Repùblica

Is indipendentistas de Repùblica sunt organizende sa prima festa natzionale issoro in Milis, Republicana, sàbadu su 12 de santugaine. «Est unu momentu pùblicu e abertu – narant – pro cumpartzire esperièntzias e isperas, pro si cunfrontare e fraigare paris su caminu conca a sa Repùblica de Sardigna». Duas sas dibatas in programma.

Sa prima in contu de energia in pare cun Antonio Meloni (rapresentante de Repùblica e responsàbile de su Tzentru de elaboratzione energia), Marco Pau (Coordinamentu de sos comitados sardos contra a s’ispeculatzione energètica), Roberto Congia (Movimento pastori sardi), Renato Soru (ex presidente de sa Giunta regionale sarda), Antoni Flore (sìndigu de Iscano e presidente de sa Corona de Logu).

In sa segunda s’at a chistionare de indipendentismu europeu cun Laura Borras (presidente de Junts per Catalunya e ex presidente de su Parlamentu catalanu), Conxita Bosch (de sa segreteria internatzionale de s’Anc - Assemblea nacional catalana), Jordi Gaseni (presidente de s’Ami - Associació municipis per la independència e senatore de Esquerra republicana de Catalunya), Idurre Bideguren (senadora de EH Bildu, sa federatzione de sa manca indipendentista basca), Petru Antone Tomasi (boghe de su movimentu indipendentista corsu Nazione), Gavino Sale (de Repùblica), Riccardo Pisu Maxia (presidente de Ans - Assemblea natzionale sarda) e Gabrielli Cossu (presidente de Fins - Federatzione isport natzionale sardu).

Ant a serrare sas allegas Davide Corriga, Vittorio Cuccheddu, Gabriele Littera, Sebastian Madau, Simone Maulu, Sarah Poddighe, Gianluca Serrenti, Marta Spada, totu cantos de Repùblica.