Chistione palestinesa, su 2 in Casteddu s'assemblea de s'assòtziu Gramsci

«Dae belle un’annu assistimus impotentes a unu genotzìdiu chi s’acumprit cun sa complitzidade de sos guvernos otzidentales. Sa crèschida de sa violèntzia sionista corfet a su Lìbanu in su mudìmene de sa comunidade internatzionale. A sa boghe nostra no l’ascurtant, ma non sessamus de sustènnere sa càusa legìtima de unu pòpulu aoradu, torturadu, oprìmidu dae deghènnios e a s’ispissu ismentigadu». Cun custas paràulas sos de s’Assòtziu Antoni Gramsci de Casteddu organizant un’assemblea titulada “Dal fiume al mare. Questione palestinese e diritto di resistenza”. Ant a faeddare Daniele Garofalo (chircadore e analista in contu de terrorismu islamista e geopolìtica) e Matteo Meloni (giornalista espertu de Oriente mesanu e Nord Àfrica giai prepostu a s’imprenta in su ministeru de sos Afàrios èsteros). Coòrdinat e isterret Michela Caria de s’assòtziu Gramsci. Apuntamentu a sas 17.30 de mèrcuris su 2 de santugaine in carrera de Baudi di Vesme 6 in Casteddu.