"Street food", creschet in Sardigna sa ristoratzione itinerante e ambulante

Panadas, cocones, pitzetas, culurgiones, seadas ma fintzas pane fratau, frègula, malloreddos, pratos frintos, biològicos e veganos. Totu màndigos chi si podent papare passigende.

Creschet fintzas in Sardigna su chi li narant street food aunende retzetas de su connotu e tendèntzias noas. Sa resèssida de sa ristoratzione itinerante e ambulante nos la contat Confartigianato Sardegna chi cun s’ufìtziu istùdios suo at elaboradu sos datos de su 2023. Prus de 200 sunt sas impresas cun unu +90% in sos ùrtimos chimbe annos. Sos prejos bonos e sa forma de bèndida apretziada ant agiudadu meda a custa crèschida de sas preferèntzias in sos consumadores sardos.