"Sole" e "Bentu" dae sas ventanas de su Redentore, sa proposta de ArtEntu

«Sa festa de su Redentore, istimada meda dae Grazia Deledda e tzelebrada sa prima bia su 1901, rapresentat unu momentu de orgòlliu pro sa terra nostra cun sa Sardigna chi isfilat galana e cun milli colores e chi contat sas raighinas suas pro mèdiu de bestires e caratzas». Est su chi narant sos de su colletivu ArtEntu chi nch’àrtziat s’apuntamentu de domìniga 25 a megàfonu potentziale pro «sa defensa de sa Sardigna contra a s’ispeculatzione energètica».

S’invitu est a sos tzitadinos de Nùgoro pro chi dae sas ventanas issoro boghent lentzolos arbos cun sas iscritas “sole” e “bentu” comente «singiale de resistèntzia muda contra a unu modellu de isvilupu chi non rispetat sa terra nostra».