Fibromialgia, Zuncheddu: «reconnòschere esentziones pro bìsitas, esames e terapias»

«Sos cussigeris de Orizzonte comune e Deriu de su Pd diant dèvere ischire chi si a su presente sa fibromialgia no est parte de s’elencu de sas maladias crònicas, duncas in sos livellos essentziales de assistèntzia, no est ca sa maladia non b’est, comente narant, ma ca cun s’isperdìtziu de su sistema sanitàriu pùblicu, pro responsabilidades polìticas trasversales, sos diritos de sos malàidos est prus fàtzile a los pèrdere chi no a los achirire o a los mantènnere». Sunt sas paràulas de Claudia Zuncheddu de sa Rete sarda in difesa de sa sanidade pùblica como chi su tema de sa fibromialgia est torradu in àula: «Una pallina de ping-pong – annanghet Zuncheddu – in sas mesas de cussigeris pagu atentos e infadados, una cuntierra polìtica chi non cunsiderat sa salude de sos malàidos». S’ex cussigera de tzentru manca ammentat sa motzione sua de su 2011 pedende amparu prus mannu e chi la firmeint sos collegas suos de coalitzione. Gasi etotu sa lege 5 de su 2019 promulgada dae Pigliaru. Sas uras de Zuncheddu pertocant un’interessu nou pro reconnòschere esentziones pro bìsitas, esames e terapias pro fatzilitare diàgnosis primidias.