Europeas 1 - Creschent populares e dereta

Comente nde essit s'Europa dae custas votatziones? Su Partidu populare europeu at a ocupare 185 iscrannos de 177 chi nde teniat; sos sotzialistas e democràticos 137 (dae 144); sos liberales de Renew nche falant a 79 (101 fiant); sos cunservadores colant dae 67 a 73; sos sovranistas abarrant a cuota 58; sos birdes nde perdent una bintina (dae 71 a 52); sa manca nde perdet unu: 36. In Itàlia su cunfirmat sa formatzione de sa presidente de su Cussìgiu e fintzas in Frantza binchent sos natzionalistas de Le Pen. Sa dereta estrema creschet in Germània cun Afd chi nche colat sos sotzialdemocràticos de su cantzelleri. Sa manca andat bene in Iscandinàvia (in Danimarca e in Finlàndia nch’ant coladu sos sotzialdemocràticos e in Isvètzia est andada prus chi non bene).