Sos giornales de oe #067

Bonas dies. Faeddemus·nde. Ca non si podet istare in fatu a Salvini iscriende una die chi «Solinas at traballadu bene» e chi (cosa òvia) cheret «torradu a candidare», un’àtera chi «l’ant a disinnare sos sardos», como chi «est su candidadu de sa Lega». Ite est chi non torrat in s’allega de su vitze primu ministru a chèrrere unu candidadu a guvernadore unu de sa sucursale sarda sua? Salvini at mudadu idea? No. Salvini l’est blindende? In concas sua eja. Su Salvini chi mudat idea est su chi agatamus in Facebook o in Twitter, cun una cosa narada de una manera carchi annu a como e una a s’imbesse a pustis. Su Salvini chi benit a Sardigna in tour pre eletorale («B’apo a bènnere – leghimus a tipu “ciclo” – una bia su mese»...cun s’ispera chi cada borta no li diant una prima pàgina) est su matessi chi diat chèrrere porrogadu pro sa chistione de su late, pro cumprèndere si sos efetos de sa polìtica sua sunt petzi sos protzessos a sos pastores chi manifesteint peri sas istradas. Como, pro nàrrere, su chi narat de èssere unu «protagonista in Sardigna dae su 2019» s’est proponende comente «mediadore» pro s’istàdiu de Casteddu e pro sa chistione aeroportos. Acudie! Ma torremus a sas regionales: su candidadu de una coalitzione no lu sèberat unu ebbia e si abbaidamus sos matessi giornales, chi s’utilidade issoro la tenent, bidimus chi sas variàbiles àteras sunt. Unione: «Eris est brincada sa setziada de su Cussìgiu regionale cun in agenda sa dibata generale movende dae sas motziones pro sos bator ospidales noos de Casteddu, Tàtari, Sulcis e S’Alighera». Sa riunione fiat pro sa 17 ma a sas 18 s’assessore Doria galu non si fiat presentadu. Su presidente Pais at rinviadu duncas a sas 10 de custu mangianu. A bìdere istemus, ca sas positziones de Forza Italia, cun s’ex assessora Alessandra Zedda non pertocant ebbia su mèritu de sa chistione ma finamentas sa definitzione de sa coalitzione e de sa ghia sua conca a sas eletziones. La Nuova: «Sa Giunta at disertadu pro intreu s’àula de su Cussìgiu, nche fiat in Villa Devoto pro sa nòmina de su segretàriu generale». E como chi l’ant fatu non bi diat dèvere problemas pro sa «màchina amministrativa regionale». Problemas chi abarrant in su microtzitèmicu. Sa Nuova nos contat de sas dimissiones de Doria pedidas dae su senadore dem Marco Meloni. S’Unione de «Matilde e Salvatore isetende dae tres meses» e de Nicola «dae unu mese e tres chidas». Ite? Chi nde lis boghent su catètere benosu. Chi nât chi fiat fàula (leghide sa rassigna de eris). S’Asgop at publicadu in rete «immàgines chi batint su prantu». «E mancu male chi un’annu a como aiant dèvidu mutire a sos carabineris in repartu, posca un’espostu in procura e galu protestas pro mancàntzias de continu» etc... Unu mediadore fintzas inoghe?