Testùine Careta Careta liberada in su mare Pula

Aprofundimentu de su chenàbura -  Su 28 de su mese de làmpadas coladu sa testùine de mare Careta Careta, sarvada dae sa Guàrdia de Finàntzia, est istada liberada in su mare de Pula.
Ma pro cumprèndere mègius custa istòria bella faghimus unu passu in dae segus: sa testùine de mare fiat istada abbistada dae sa Guàrdia de Finàntzia su 18 de su mese de freàrgiu. A l'abbistare est istada sa nae ammiràllia "Osum", chi a pustis at dadu a sa Careta Careta su nùmene suo, sa testùine, difatis, est istada batijada "Osum".

Sa Careta Careta, manna 65 tzentìmetros, fiat firma firma a pìgiu mare, pro more de àere problemas a si mòvere.

Cando l'ant abbistada sos de sa Guàrdia de Finàntzia ant fatu luego su recùperu. Pro èssere pretzisos s'atzione est istada ghiada dae sos militares de su Repartu operativu "aeronavale" de Casteddu, chi cando l'ant sarvada l'ant acumandada a su "Centro recupero cetacei e tartarughe marine" "Marina di Nora".
A pustis de bator meses e prus de curas, sa Careta Careta Osum at torradu a agatare sa balia sua. Gràtzias a custu resurtadu bonu meda, su testùine est istadu torradu a su habitat naturale suo, e oe est lìberu e sanu.

Sas operatziones chi ant liberadu a Osum in mare sunt istadas ghiadas dae su punteradore de sa Guàrdia de Finàntzia. Durante sas operatzione bi fiant finas s'assessore de sa Defensa de s'Ambiente Marco Porcu, sa coordinadora de sa "Rete regionale per la conservazione della Fauna Marina" Elisa Mocci, su diretore generale de su "Corpo Forestale e di vigilanza ambientale della Sardegna" Fabio Migliorati, su responsàbile de su "Centro recupero Cetacei e Tartarughe marine" "Laguna di Nora" Giuseppe Ollano, sas cussigeras de sa Comuna de Pula Simona Urru e Eleonora Pili e su Cumandante de su Repartu operativu "aeronavale" de sa Guàrdia de Finàntzia de Casteddu su Tenente Colonellu Francesco Corcelli.

Durante sas fases de s'emitida in mare, pro compidare sos primos passos de Osum, sos finantzieris ant dadu a su testùine totu s'assistèntzia netzessària a lu acumpangiare in abba a manera segura.