Sos giornales de oe #053

Che chi no esserent parte de sa Giunta deliberende su fràigu de 4 istruturas noas a dannu de sa modernizatzione de unas cantas giai esistentes. Che chi parte de sa Giunta lis apat cuadu su dispositivu de sa delìbera de su primu de làmpadas. O chi si siant sapidos, a pustis de dies intreas de allega e cun trìulas acurtziende·si·nche chi sa cosa gosi no andaiat bene pro sa Sardigna ma chi imbetzes andat prus chi non bene pro sa cuntierra interna?

In antis fiat Fratelli d’Italia ebbia, como fintzas Forza Italia est contra a sa croba barbuda Solinas-Doria. S’assist de sa senadora meloniana Zedda est isfrutadu como dae un’àtera Zedda, Alessandra, ex assessora de sa Giunta Solinas.

Leghimus in s’Unione: «Cun sa salude non si brullat. Comente amus bidu fintzas cun sa pandemia, setore vitale est issa e non podet èssere lassada a sa discretzione de una persone o de Ares ebbia. Est s’Assemlea chi devet disinnare». In sos faeddos suos fintzas unu «stop deretu in contu de disinnos pro su benidore de su Brotzu. Fintzas ca non si podet pensare a una serrada lestra de unos cantos ispàtzios sanitàrios suos».

Gosi sos faeddos suos in sa Nuova: «Movende dae sas rivendicatziones e dae sas lamentelas de sas partes sotziales, de sos sindacados e mescamente de sos patzientes, penso chi siat de giudu a nche giùghere custa chistione de importu a Consìgiu sena pèrdere àteru tempus. Tempus chi, imbetzes, pro como l’ant lassadu petzi a sos proclamas e a sas essidas pala-pala».

In su mentres Solinas est ponende sos puntellos a s’alleàntzia sua cun Salvini pro istradas, digas e ferrovias: «Unu pianu pro s’ìsula cun 30 milliones in prus». E nudda de mancu in contu de annestru bèllicu lu narat Crosetto: «Semper e cando no amus a impignare pro un’isvilupu de sa Sardigna». Eja.