Sos giornales de oe #047

Si non fiat fàtzile a aprontare una rassigna lunis e martis pro more de promotzione de su Cagliari e de sa dispedida de Berlusconi, mancu oe lu est, cun Ranieri chi pensat a su campionadu imbeniente e cun su corrutu natzionale decretadu pro su cavalieri. Ma colende sas noas in su sedatzu, finas movende dae su connotu, carchi cosa la devimus agatare.

Pro nàrrere, comente ant a èssere Forza Italia e su tzentru dereta dae como in susu finas a sas regionales imbenientes? “O est babbu o est bàrriu de pàgia” est sa sìntesi de l’Unione sarda chi narat: «Sa morte de su presidente de Fi podet mudare totu o fintzas nudda». E chi totu dipendet «dae comente s’ant a definire sos echilìbrios de su partidu a livellu natzionale e, fintzas, dae ite at a disinnare sa famìlia Berlusconi chi tenet sa responsabilidade de su finantziamentu de su partidu».

Duncas est galu chitzo pro cumprèndere si b’at possibilidades pro sos asulos Alessandra Zedda o Pietro Pittalis, cun Solinas chi cheret su bis arrumbende·si a sa Lega e Fratelli d’Italia chi devet pensare bene bene a cale Regione punnare.

Sa chistione Forza Italia – Fratelli d’Italia – Psd’Az – Udc ànimat però su tzentru dereta de s’Alighera, chi eris - comente nos contat La Nuova sardegna - at aprovadu su bilàntziu (a pustis de su primu votu...de terra) sena sos votos tzentristas e cun s’ausèntzia de su Fdi Monti (che a s’àtera borta).

Ischimus chi su sìndigu Conoci, sardista, no est in sintonia manna cun s’assessore regionale de sos Trasportos de su matessi partidu pro more de sa chistione aeroportuale, ma ischimus finamentas chi (leende giornales de sos meses colados) dae FdI b’at àpidu duas fuas: sa prima su 2021 cun su consigeri Christian Mulas, como in s’Udc e contràriu fintzas eris a su bilàntziu; sa segunda – conca a Forza Italia – pagas dies in antis de sas votatziones italianas chi incoroneint a Meloni cun s’ex assessore e consigeri An-Pdl-FdI Ennio Ballarini, àteros tres o bator nùmenes de punta de su partidu e unos trinta tesserados. S’atuale consigeri Fdi Monti ausente eris pro su bilàntziu (pro «motivos personales») est unu ex Lega.

Tendèntzias chi s'ant a pòdere repìtere – a un’ala o a s’àtera – manu manu chi si nch’acùrtziant sas regionale. Mescamente como, a àrbore ruta. Ma semper in intro de sa coalitzione. Ca ischint chi podent torrare a bìnchere e giai si presentant ghetados a pare.