Traballos istradales, «2 milliardos de èuros firmos», narat sa Cisl

«B’at belle 2 milliardos de èuros pro sos traballos peri sas istradas istatales sardas firmos in regione pro s’inèrtzia de sa gestione cummissariale». Est sa denùntzia de sa Fit Cisl, chi annanghet: «sunt 10 sos interventos chi isetant de èssere acumpridos e a oe mancu s’istrutura cummissariale ant nominadu».

Dae su sindacadu narant chi est pròpiu sa gestione cummissariale sa chi dat sa possibilidade de atzelerare progetos e apaltos. «Su perìgulu – narant – est de pèrdere sos traballos de sa 554 agiudicados dae tempus e firmos, cun su disinteressu totale de sa diretzione generale de s’Assessoradu de sos Traballos pùblicos».

Sos àteros traballos firmos pertocant sa 131, sa 130, sa 291 Sassari-Alghero, sa 195 Sultzitana, sa 126 in tretos de Sant'Antiogu e sa 125/133 bis Terranoa-Palau-Alzachena e sa 125 in tretos de Tertenia. «Dae santandria de su 2021 – serrat su sindacadu – su cummissàriu istraordinàriu est Solinas».