Sustenibilidadi: contzimis fatus de s'impestadura de sa depuratzioni de s'àcua
Terra - Contzimis “green” (est a nai birdis ndr) chi benint de s'impestadura de sa depuratzioni de s'àcua. Est custa s'idea, e po finas unu programa de traballu, de unu progetu internatzionali chi tenit comenti protagonistas Arborea e sa Giordania. Unu progetu chi est istètiu presentau in Aqaba, tzitadi de portu de sa Giordania.
Is contzimis “green”, mancu a ddu nai, funt sustenìbilis e ant èssiri fatus produendiddus de s'impestadura de sa depuratzioni de s'àcua. Ant a podi èssiri impreaus in sa masserìtzia a stracu baratu e cun nd'unu resparmiu mannu de àcua.
Faint parti de su progetu siat Cirem-Crenos siat Enas, chi ant potziu tenni una manu de agiudu de parti sa “Cooperativa produttori” de Arborea e po finas s'apògiu de su Comunu de Arborea e de s'Agentzia regionali Laore.
Su traballu est incumentzau in su 2019. Bisòngiat a pretzisai, perou, ca custu progetu at otentu unu finatziamentu europeu de 2,4 milionis de eurus.
In s'atopu internatzionali de Aqaba funt istètius presentaus is resurtus otentus de s'impiantu isperimentali innovativu realizau cun sa punna de ndi bogai contizmi de s'àliga produida de is impiantus chi depurant s'àcua de sa Cooperativa produttori de Arborea.
S'''impiantu isperimentali de Arborea - acrarat a s'ANSA su professori de sa 'facoltà di Studi economici, giuridici e politici' Giovanni Sistu – est traballendi de su mesi de argiolas passau po torrai a impreai s'àliga produida de is impiantus zootènnicus. Prusetotu traballat po fai su contzimi green, impreendi aici tennologias innovativas de “stripping” in nd'unu tretu chi est delicau meda po mori de sa presentzia de nitraus. Custu impiantu - acrarat ancora Sistu – ndi liat a manera eficatzi s'ammonìaca de s'àcua impestada e dda mudat in sorfatu de ammoniu, unu contzimi impitau meda in masserìtzia e chi si podit dosai sena de fai dannu a s'ecusistema”.
Unu progetu de sustenibilidadi, duncas, ghiau de sa cooperatzioni Mediss (est a nai: s'Autoridadi Palestinesa, s'Itàlia, sa Giordania e sa Tunisia). Unu progetu chi fait parti de is atzionis innovativas chi tenint comenti obietivu su de fai resparmiai àcua. Prus a notu, custa cooperatzioni internatzionali tenit sa punna de fai crèsciri un'àteru pensu, un'àtera manera de impreai s'àcua, massimamenti s'àcua salamastra impestada e a pustis depurada.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
