Prorogau su bandu "Sardegna un'Isola Sostenibile"
Terra - Pròrogau a su 30 de su mesi de onniasantu de su 2021 su bandu "Sardegna un'Isola Sostenibile". A ddu fai sciri est su giassu de "Sardegna Ricerche", chi at publicau un'avisu de pròroga chi pertocat su progetu “Complesso Turismo, Cultura e Ambiente".
Su progetu, chi est promòviu de "Sardegna Ricerche", est finantziau cun s'istrategia de ispetzializatzioni S3 de sa Sardigna, POR FESR 2014-2020, "Asse I - Ricerca Scientifica, Sviluppo Tecnologico e Innovazione".
Ma ita est "Sardegna un'Isola Sostenibile"? Comenti eus giai atzinnau "Sardegna un'Isola Sostenibile" est unu progetu promòviu e ghiau de "Sardegna Ricerche", unu progetu chi ponit impari sa moda noa de su turismu sustenìbili cun is modellus nous de isvilupu econòmicu.
In Sardigna cun custa "coja" si olit fai crèsciri s'interessu po s'innovatzioni in totu su cumpartu turìsticu. Po ddu fai beni, perou, tocat a castiai a is capatzidadis de is territòrius e po finas a is cumpetèntzias chi s'agatant aintru.
Po cumprèndiri mellus su progetu promòviu de "Sardegna Ricerche" bisòngiat a sutalineai ca "Sardegna un'Isola Sostenibile", e duncas puru su "Progetto Complesso Turismo, Cultura e Ambiente", tenint sa punna de promòviri s'isvilupu de prodotus, protzessus e serbìtzius nous e innovativus po su territòriu. Ancora, custu progetu olit afortiai sa creatzioni de una retza intre pùblicu e privau e intre privaus etotu in matèria de cumpetitividadi de su sistema produtivu. Totu custu tenit finas s'obietivu de fai crèciri prusatotu s'innovatzioni de su produtu, s'innovatzioni de su protzessu e s'innovatzioni de su serbìtziu.
S'obietivu est su de amanniai s'oferta turìstica cun s'isvilupu e s'afortiamentu de produtus diferetziaus e cun sa creatzioni de unu sistema de governance territoriali eficatzi. Po ddu fai tocat a mudai su cumpartu fadendiddu prus interessanti e prus cumpetitivu.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
