Innovatzioni e sustenibilidadi: in Crabonaxa si gherrat contra a s'impestadura ambièntali

Terra - De su mesi de argiolas passau in Crabonaxa, sa bidda de sa Sardigna de su cabu de giossu famada meda po su turismu, si gherrat contra a s'impestadura de su mari. Ma comenti si fait? Po custa lota s'arma impitada po agiudai s'ambienti est una piscedda chi gallìgiat in s'àcua. Sa piscedda dd'ant batiada cun su nòmini de Seabin.

Seabin est su resumu chi ponit impari innovatzioni e sustenibilidali. Sa piscedda, crocada in su pillu de s'àcua, permitit de manigiai 25 milla litrus de àcua dògnia ora. Mancu a ddu nai: cun s'impreu de Seabin sa punna est sa de amparai totu s'”Area Protetta” de Cabu Crabonaxa.

Ma de ita depit èssiri amparau su logu? Simpli: de s'impestadura fata de sa pràstica e de sa micropràstica.

Ma Seabin est unu dispositivu bellu aberu po ndi liai pràstica e micropràstica o est una faula manna? A si donai is respustas chi seus circhendi funt is pretziaduras asuba de su traballu chi sboddiàt su dispositivu etotu.

Is pretziaduras si narant ca gràtzias a custa piscedda in nd'un'annu feti at a èssiri possìbbili a ndi pigai de su mari pagu prus o mancu de 500 chillus de refudus chi gallìgiant. Est a nai ca at a èssiri possìbbili a ndi regòlliri unu pesu cantepari a 30 ampudeddas de mesu litru, 100 milla bustas de pràstica e 250 milla cannitus de pràstica. Duncas cun custus nùmerus podeus nai ca su mari at a èssiri limpiau de cosa meda e s'impestadura at a ispaciai a pagu a pagu.

Po Amedeo Ferrigno, diretori de sa Marina, custa est una faina bella meda, poita "Crabonaxa est pigada a cunsidèriu comenti unu de is mellus aprodus chi agatant in su mundu", unu logu "innoja natura e ispàssiu tenint su mantessi colori: su de su mari lìmpiu de Sardigna". Unu mari chi po Ferrigno depit èssiri un'"esèmpiu caraterìsticu de s'echilìbriu intre su turismu e su respetu po su paesàgiu".

Attività realizzata col contributo della Regione Sardegna - IMPRENTAS 2020-2021. LR 22/2018, art. 22