“Plastic Hunt 2021”: sa “Medsea Foundation” s'aunit a su progetu

Terra - Sa “Medsea Foundation”, chi tenit domu in Casteddu in arruga Piemonte 33, e chi comenti eus giai iscritu in àteras novas ponit impari circadoris e circadoras cun sa punna de amparai is resursas ambientalis de su mari de Sardigna, ocannu puru sighit unu progetu sustenìbili ispantosu. Difatis, po s'istadi de su 2021 sa “Medsea Foundation” pòmpiat su progetu “Plastic Hunt 2021”.

Ma de ita seus fueddendi? Su “Plastic Hunt 2021” est un'initziativa internatzionali de “Clean-Up”. Custa manifestada sustenìbili est nàscia s'annu passau cun s'idea de aprontai atòbius chi depiant serbiri a limpiai is arenàrgius in logus chi funt atesu meda s'unu de s'àteru.

Su chi bisòngiat a pretzisai, perou, est ca po s'istadi de su 2021 su “Plastic Hunt” contat sa bellesa de sesanta-cincu iscuadras de genti chi bivit in trintotu istadus de su mundu. Custus funt nùmerus de importu e tocat a ddus sutalineai a manera ladina.

Aici, partendi de s'1 de austu chi at a benni, in Sardigna puru is volonteris ant a fai a gara po arregòlliri s'aliga chi s'agatat in su mari e in is arenàrgius de is costeras de s'ìsula nostra, ma dd'ant a fai comenti chi fessat unu giogu. Difatis, atressu de quiz, giogitus apariciaus po mandai ainnantis custa manifestada ambientali e àteras cosas chi ant a ispassiai chini nd'at a pigai parti is iscuadras ant a gherrai po arregòlliri cantidadis mannas de refudus. A s'acabada, at èssiri una zuria de giovuneddus a dessìdiri chini at a bìnciri.

Sofia Bonicalza at èssiri s'imbassadora de su “Plastic Hunt 2021”. Sa “Medsea Foundation”, imbecis, at a rapresentai su sponsor de custa initziativa de importu. Ma no est totu. Difatis, sa Medsea est agiudendi Sofia Bonicalza po circai po finas finantziamentus chi ant a serbiri po premiai is volonteris chi ant pigai parti a custa manifestada.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22