Coronavirus: “Carrello sospeso”, su progetu de agiudu de “Madiba Coscienza Civile”

In Terraba, su Comitau “Madiba Coscienza Civile” donat vida a s'initziativa de solidariedadi “Il carrello sospeso”. Su progetu est nàsciu pensendi a chini, in custu momentu de apretu, s'agat in dificultadi econòmica po mori de su coronavirus.

Gràtzias a “Il carrello sospeso”, chini bolit donai una manu de agiudu a is tzitadinus chi tenint prus abisòngiu, at a podi comporai unu pagu de ispesa de ponni aintru a is iscàtulas chi s'agatant in unu cantus butegas de sa bidda.

Su progetu est cumentzau de pagus diris, ma sa lista de butegas aundi podi pigai parti a “Il carrello sospeso” est sighendi a crèsciri.

In diri de oi is butegas chi agiudant s'initziativa de su Comitau “Madiba Coscienza Civile” funt: sa paneteria “Fromentu”, su megamercau “Conad Terralba”, “Cestall La Bottega dal 1965”, s'“IGLOO Surgelati Terralba”, su megamercau “Eurospin Terralba”, su “Fai Spesa di Fais & Tiddia snc”.

Is butegas chi ant a bolli pigai parti a su progetu podint iscriri in sa pàgini facebook de su Comitau o mandai una email a s'indiritzu de posta eletrònica: comitatomadibaterralba@gmail.com.