Una bighina disconnota: biàgiu a Tunisia

(IlMinuto) – Casteddu, su 3 de argiolas - Sa Tunisia est sa terra firma prus probiana a sa Sardigna (184 km isceti) e mancari siat un'istadu minoreddu in su nord de su continente africanu, giughet in palas suas un'istòria manna iscrita dae totu sas tziviltades chi l'ant pesada. Pro custa resone sa Redatzione nostra bos est proponende unu biàgiu a Tunisia, pro sos giòvanos chi lis praghet s'aventura e a connòschere culturas diversas.

Fintzas si sas plajas sunt s'atratzione chi interessat a su prus de sos turistas, cussa terra at cosas medas de donare, cumentzende dae sos giassos archeològicos antigos de 2500 annos.

Unu logu de maia, gianna de su desertu de Sahara cun sos paesàgios suos galanos, sa Tunisia bos dat s'ocasione pro connòschere sos usos e sa cultura magrebina, gràtzias a su pòpulu suo garbosu.


Su chi cussigiamus a sos giòvanos biagiadores nostros est de cumentzare a esplorare sa Tunisia girende, in su primu biàgiu, su cabu de susu de sa terra tunisina. In su nord difatis si podent bìdere giassos archeològicos de interessu mannu, che a su de Bulla Regia, su de Cartàgine o Dougga, unu de sos chi ant cunservadu mègius, chi bos ant a iscoviare sas tzitades romanas de sa Tunisia e in ue podeis castiare su Capitòliu galanu. De ogni manera, essende su nord de sa Tùnisia ricu meda de giassos de importu, bos cussigiamus de cumentzare sa vacàntzia visitende Tùnisi, sa capitale.


In Tùnisi, unu logu chi bolet bidu est sa Medina, su tzentru istòricu de sa tzitade àrabu-musulmana de Tùnisi. Foras de sa "Medina", in sa costera a nord de sa metròpoli, s'agatat Cartàgine (bos cussigiamus de andare a Cartagine cun su taxi), e in prus de custa b’est su museu Bardo cun sa colletzione sua bella meda de mosàicos romanos.

Sos palatzos prus bellos e antigos de sa tzitade sunt cuntzentrados in sa Medina e in sos cuartieris residentziales, in sa costera.

Tùnisi tenet sa Medina prus manna de su Nord Àfrica (270 ètaros). Rica de 13 sèculos de istòria.

In sa Medina s'agatat puru su ristorante Dar El Jeld. Inoghe, si podent assagiare prus de ses tipos de cous cous, e, in prus, pratos agiumai ismentigados comente sa shimka, o durches cremosos comente su adda zgougou.

Pro bos gosare mègius sa Medina de Tùnisi su consìgiu nostru est su de fàghere su tour ghiadu a s'iscoberta de sa Medina.

Jamila Binous, istòrica e urbanista, ogni domìniga, organizat unu tour ghiadu de tres oras pagu prus o mancu (a sas 9.45, partèntzia dae Le Diwan in rue Dar El Jeld). Su tour incluit:

- visitas a sas moscheas e mederse (sas iscolas coranicas antigas) de sa medina de Tùnisi

- su souk de sas erbas

- visita a sa "Domo Sicilia" cun su museu de sas terràllias antigas

- visita a su cafè M'Rabet, su primu de Tùnisi, otentu in unu mausoleu de su XVII sèculu dae sos turcos

- su souk de sos sartos, in ue galu si cosit e si ricamat a manu

- su souk de s'oro, in ue sos arredos de sas butegas prus ricas si sunt costoidos bene

E pro faghere còmporas? Pro faghere còmporas sas tentatziones sunt medas. A prus de sas bancarellas de sos souk, in carchi palatzu s'agatant butegas chi aparant produtos de calidade fatos de sos artesanos.

Sunt de no ismentigare, pro agatare unu pagu de recreu, sas plajas galanas in sas cussòrgias de Tabarka, Biserta e Sidi Ali el-Mekki.
Semper in su nord de sa Tunisia, sos istimadores de sa natura e de sas escursiones podent fàghere sos caminos de trekking in sos padentes de sos montes de sa Kroumirie e pro sos chi lis praghet su birdwatching, chi est a osservare sos pugiones, cussigiamus unu giru in su Parcu Natzionale de Ichkeul, a curtzu a Biserta!

Carta de identidade de su logu