"Su Binu in Sardigna" imprentau de Ilisso lompit terzu in su Gourmand International Award 2012

Ascurta custa nova



(S’úrtima nova) – Casteddu, 23 de su mesi de martzu – Un'àteru prémiu de importu mannu po s'enologia sarda. Su cuncursu internatzionali Gourmand International Award dedicau a is líburus de su cumpartu enogastronomia e coxina, in sa setzioni dedicada a is òperas chi fueddant de binu, sutasetzioni Europa bogada sa Francia, donat s'importanti prémiu suu a su "Su Binu in Sardigna", chi artziat in su podiu pighendusì su terzu postu in s'editzioni de su 2012. Medàllia de brunzu, duncas, a unu líburu chi documentat s'istória longa de su sarmentu e de su binu, e ddu fait atressu de is màginis prus bellas e de is pàginis de is istudiosus prus cumpetentis de su cumpartu. 600 pàginis arricas de scedas, cussas imprentadas de sa Illisso, innoia s'agatant notzionis chi andant de s'istória de su traballu de is bingias a s'esamu de is sarmentus originàrius de sa Sardigna. S'arrichesa, sa traditzioni e sa grannesa de sa coltivatzioni de sa bingia in s'ísula est perou acapiada puru a is numerosas cantinas e a is diversus coltivadoris chi cun incuru e passioni portant su binu sardu in su mundu. No est sa primu ia chi sa Sardigna cumparrit induninduna in gíriu de is gourmet francesus. Amentaus, difatis, ca in su 2004 beniat presentau a su 57º Festival de Cannes su film-documetàriu "Mundu Binu", de su regista Jonathan Nossiter, chi bidiat intre is protagonistas suus unu produsidoreddu de sa Malvasia de Bosa. Si preguntaus si a sa luxi de is tantis prémius, sa Sardigna potzat isvilupai unu turismu de su binu chi potzat tenni sa mantessi grannesa de is binus suus. E bosàterus ita ndi petzasis? Sa redatzioni de IlMinuto torrat lúnis cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda