Àliga day

(Chistioni e Opinionis) - Casteddu 7 de su mes'e maju - Sachitas de s'àliga, materialis tóssicus e perigulosus, pilas scàrrigas, pneumàticus, lavadoras e televisoris. Ita est chi fait movi a is personis a abbandonai is arrefudus in s'oru de sa strada? Est difícili donai un'arrespusta a custa dimandha. De su 2010 su movimentu "Sardegna Pulita" e su grupu de is marciadoris de is "Corsardi" ant decidiu de contrastai custus modus de fai cun d-una campagna informativa e de prevenimentu in totu su territóriu de sa Sardigna: s'Àliga day. "Nisciuna strada - acrarant is aprontadoris in d-una nota - si salvat de unu cumportamentu scurrígiu chi bit s'ambienti comenti calincunacosa capassu de smartiri calisisiat arrefudu, comenti si s'única cosa de importu siat a no tenni s'àliga asuta 'e domu. A custu puntu totus is comunus de sa Sardigna ant fattu muntronaxus cuntrolladas aundi si podint portai totus is tipus de arrefudu. Poita insaras sighit custa angaria infadosa a s'ambienti e a su paisagiu?" "Su primu Àliga day s'est tentu su 4 de su mes'e cabudanni de s'annu passau cun duus apuntamentus principalis: is manifestadas simbolicas de is marciadoris contr'a s'abbandonu de is arrefudus in diversus tretus de is istradas statalis 131 e 129 e in cuatru provìntzias sardas diversas, su convegnu "Políticas de contrastu a s'abbandonu de is arrefudus i a muntronaxus abbusivus", in Macumère. Sa segundha editzioni de sa manifestada, previdia po su 21 de su mes'e maju, tenit giai s'apógiu de s'Anci Sardigna e - tra is àterus - tenit s'adesioni de s'assótziu Musa Sardigna, chi at liai is arrefudus de unu tretu de su cucuru de Monti Urpinu, in Casteddu. "In sa segundha editzioni de s'Àliga day - acrarat su presidenti de Musa Sardigna Paolu Erasmo - iaus a bolli chistionai puru de ortus ubanus e de avaloramentu de is areas birdis aintru de sa citadi nostra".
E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda