Sardigna: terra de acasàgiu?

(Chistionis e Opinionis) - Casteddu, 12 de su mes''e arbili - De mércuris passau 700 citadinus tunisinus funt acasigiaus in d-un'ex depósitu de s'Aereonautica militari in s'arburada Su Masu, in Casteddu. Personis chi si fuint de su fàmini, in circa de una vida noa, su prus de is bias cun s'obbietivu de sodigai a is parentis giai emigraus in logus comenti sa Francia. Abetenti su permissu de tratenimentu promitiu de su Guvernu italianu, dexinas e dexinas de custas ànimas ant brincau is cungiaduras de su depósitu in s'arburada Su Masu, incugiaduras ingiriadas de filuferru spinosu, e dd'ant fattu cun trancuillidadi, po passillai pagu pagu in sa citadi e po torrai in s'istrutura debressi. In is diris passadas sa "capitali" de sa Sardigna at obertu is ennas suas a custa genti, dimustrendusì una terra de acasàgiu a sa faci de cantu narant is mass media: cun is giornalis de su logu comenti sèmpiri prontus a sulai asuba de su fogu de su primu fattu de crònaca. In sa sedi de s'arburada Monastir sa Cgil at cumetzau un'arregorta de bistiris, crapitas, spruma de barba, shampu e saboni. Sa mantessi cosa at fattu sàbudu passau su Pcl in sa sedi s'arburada Santu Tènneru, a pagus centinas de metrus de su depósitu. "Própriu poita pensaus ca sa Sardigna siat una terra de acasàgiu e solidariedadi, - at precisau cun d-una nota, s'Osservatóriu po s'amparu de is libertadis e contr'a is scontrórius, nàsciu de calencuna cida in Casteddu - pensaus chi is 700 disterraus aghillius ariseru de sa Sardigna depant essi liberaus debressi de sa caserma de s'arburada Su Masu ingiriada de militaris de filuferru spinosu. Pedeus sa serradura de su Cpa de Su Masu e de totus is lager po furesteris e dimandhaus una política de gestioni de is fenómenus de spostamentu fundada asuba de s'arrespetu de is diritus umanus e de sa circulatzioni senz''e acapius de is personis". Puru s'assótziu Sardigna Palestina at espressau "totu sa solidariedadi sua a is disterraus tunisinus chi s'agatant in Casteddu e chi funt in d-una situatzioni de arragu mannu, situatzioni filla de una política italiana e europea foras de contu e ratzista in matéria de spostamentus". E sa Giunta regionali? Su presidenti de sa Regioni at in d-unu primu tempus at bantau "s'esémpiu de una Sardigna e de un'Itàlia chi a fac''e de is arragus donant pesu mannu a is valoris de sa solidariedadi sociali", po nai agoa perou de nono a s'arribbu in s'Ísula de àterus furesteris tunisinus. "Sa Sardigna at giai donau su contribbutu suu a s'apretu furesteris", ant nau Ugu Cappellacci e su síndhigu de Casteddu, Emili Floris in sa primu pàgini de s'editzioni de domínigu passau de su giornali prus comporau in Sardigna.
E bosàterus ita ndi pensai?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda