"In sa provìnzia de Aristanis at a serrai su 50% de is iscolas"

(IlMinuto) – Casteddu, 17 de su mes''e maju - Is traballantis de s'iscola sighint a nai no a su ministru Gelmini. In is diris passadas is maistus de s'Istitutu Superiori de Istruzioni de Abas-Mòguru-Terràrba ant difatis aprovau unu documentu nou chi analizat e bullat sa riforma de s'Istruzioni de su Guvernu Berlusconi. Unu provedimentu chi ocannu at giai mandau a domu 57milla maistus de s'iscola e s'annu chi benit at a cumpletai "su sciàsciu de su sistema iscolasticu púbblicu".
"Comenti maistus de s'Istitutu Superiori de Istruzioni de Terràrba-Abas-Mòguru - si ligit in su documentu - castiaus cun meda apinnicu s'istrobbu e su pensamentu de unu sistema iscolasticu sèmpiri prus atesu de una política de invenstimentus e sèmpiri prus sugetu a is lógicas finanziarias".
Obbietivu de is maistus de s'Istututu de Istruzioni Superiori de Abas-Terràrba-Mòguru est cussu de interessai is maistus de is àteras iscolas in su traballu de istudiu e dinúnzia púbblica de is efetus de sa riforma Gelmini. Est in perígulu - narant - s'atividadi de 50 istitutus de sa provìnzia.
"Su pensamentu - acrarant - aumentat po su tempus benidori, biu ca de su 2011 su provedimentu ministeriali (...) at a diventai operativu faendi serrai is iscolas chi tenint de mancu de 50 alunnus, est a nai su 50 po centu de is iscolas de Provìnzia".