Su Diretori de su Liricu de Casteddu isfidat su Minustru Bondi. "No a sa creazioni de teatrus de serie A e B"

(IlMinuto) – Casteddu, 19 de su mes''e arbili - "No tenit nesciunu sensu lógicu su bolli dispreziai e ofèndiri is teatrus d'òpera italianus faendi teatrus de serie A e a teatrus serie B". Cun custus fueddus su Diretori artisticu de su Teatru Liricu de Casteddu, Massimo Biscardi, cummentat s'aprou de parti de su Consillu de is Ministrus - acontessiu cenàbara passau po una proposta de su Ministru de is "Beni culturali" Sandro Bondi - de su decretu lei de "riforma de is fondazionis liricu sinfonicas".
"Est un'errori meda grai - sighit su Diretori artisticu - ai fattu una divisioni, po is teatrus d'òpera italianus, tra sa Scala e s'Académia de Santa Cecilia de una parti, e totus is àterus teatrus liricus, de s'àtera. S'Italia at fattu s'istoria de s'òpera lirica atressu teatrus comenti La Fenice de Venezia e su San Carlo de Napoli, in su séculu passau cun su "Maggio Musicale Fiorentino" e, in is ùltimus tempus, cun su Teatru Liricu de Casteddu".
Su provedimentu - si ligit in d'una nota ministeriali - "bollit torrai a assetiai totu su cumpartu e bollit previdiri, fiamenti, de fai diventai razionali s'organizazioni e s'andamentu de is fondazionis liricas". Un'organizazioni chi - in is progetus de su Ministru Bondi - passat po "s'aumentu de su capitali privau" e po s'arreconnoscimentu de "diversus gradus de autonomia de is fondazionis, a cumenzai de su Teatru de sa Scala de Milanu e de s'Académia Nazionali de Santa Cecilia".